Waxna ba tayyi waaré naat ba tayyi
Waayé taxul ñu gëmko farko bayyi

​

Jiiñ ko ku manké ñeppa naako dofba
Muy yuuxu naa maay Ndaw li maay Yonnenba

​

Xeeb nan yëfëm jeebaané nan turëm wa
Yaqqab déram jeem tilimël yoonam wa

​

Tannefya xëy di rotsi gëmsi wooteem
Soppako nawko bañ ya naa manul am

​

Ñu jeem ko neexal naako baal sa Gaayii
Té jaamu Yalla bañ juyook Tubaab yii

​

Mu lànk naa Yallaa ma sas ma wooté
Ku Yalla woo doo mana bañ doo wuuté

​

Ñu xëy kalamekook Tubaab ya naan leen
Kii nara tas seen nguur gi moom la jugleen

​

Njool toroxal gawar ga noon ya perta
Tubaab ya rus naa nanko jeema betta

​

Ña taaliwoon ay woowa seeti Njoolma
Faylooka Taalba ñooko ñakka worma

​

Njoolma nileen Taal biima taal dootul fay
Bu Tan dawee Meddëmya dootu am lay

​

Kerook la waar gëmëm ya ngir dëfël leen
Riñaani bayyi bañ ya ngir yërëmleen

​

Ñu xëy di seet seen waaja fekka Njoolma
Gaddaay na penku far fanaan ca paxma

​

Tubaabya jog soonal ña doon jeebaané
Naan fuma dal sallaaw di ngeen ko genné

​

Ñu ngay sonnal Mbokkam ya ak Soppem ya
Ñuy wër ba lotta Buura muur seen gëtya

​

Buroom xolab wurus ba ngir yërëmleen 
Wooleen ñu ñëw wërko ñjañam la sutleen

​

Waxtuwa jot mu naa farleena jiité
Ñu naako mukka rëyna liiñu wuuté

​

Njoolma di muuñ naalen ñu dem di ngeen xam
Ku juuwalook man manta mukka am ndam

​

Nan seeti ñii ngeen njortawooni man nan
Fay liima taal ñu darko melni ay jën

​

Noon yadi ree naa ngalla tay mu sànku
ku bayyiwul sun tuuryi faw nga alku

​

Soppéya xar rangooñi xol ya tuuru
di jooy ki tax ñu bàyyi ndëppak tuuru

​

Ñeey xaqqataay ngir bañko ak iñaané
Reeréni kii du noon bunuy kondaané

​

Ñëleey sikkar di tàggatook seen Njoolma
Mu naan du yàgg maa ngi ñëw xaarleen ma

​

Bu gaalgi weesoo Beer du maay seen Ndaw li
Ca Beer la ñeppa xamni moo yor Ndam li

​

Ña tëkkëwoon Nohin bëggoon ko sànk
Tuufan ba ñëw labal ña doon jaay pànk

​

Ña bëmëxoon Xaliil sa xalyaak taalba
Buur nasaxal seen yeené feg xaritba

​

Ña weddiwoon Muusaa dawal ngui rayko
La Yalla soob sa geej ga far muccëlko

​

Ña yeenéwoon Masiihu jëlko boom ko
Buur Yalla xëy yekkiko ngir wormaalko

​

Ña doon nasak nucci di yeeru Mommadu
Buur gumbëloo seen gëtya muccël Ahmadu

​

Ñoo doon fexey sànki Limaamook rayko
Ka muccëloon Yonnen ya mo xëy fegko

​

Moo nasaxal seen yeené mooko yekki
Ci Addunaak ëllëk bu ñeppay dekki

​

Kuko bawol doo noppalooti Dunyaa
Boo moytuwul doo musa tàggook lorya

​

Kuy xas yëfëm namuy julee manooko
Namuy tudee Buur Yalla xañtuwooko

​

Manoo namuy wooré manoo zakaatam
Tabam ga dooku seen daboo ay dongam

​

Seenoo ngëmëm nam ragalee Boroomam
Nam wommatoo doo masa dab Ihsaanam

​

Xas kula sut bañ kula gën du worma
Tooñ kula man du xel Limaamooy Njoolma

​

Kum nandalul sallaaw du tàggook marwa
Ku jot xolam dootooko tal ngir aywa

​

Ku bañ yëfëm sallaaw du noppalooti
Lakoy xasan du wokku Kii Moomlaati

​

Ku raam sukkëlko raw nga mangasin yi
Moo leen di duy moo amé yeegél Gaayi

​

Limaamu ñoo ngi nii di ñaan Buur fayla
Ling nu defal ñun woolu nanla gëmla

​

Kep kula xas dinan la way lu sutko
Kep kula bañ sunuk cofeel far suulko

​

Yaa tax ba doo tun tuuri ak bokkaalé
Yaa tax ba doo tun boddi benna nawlé

​

Yaa tax ba dootun saaga dootun xasté
Yaa tax ba dootun jël alal di kasté

​

Yaa tax ba dootun noonu benna soppé
Ken manta waññi len si ninla jappé

​

Yaa tax banuy sellal di xañtu Yalla
Yaa tax banuy sakku mbegëm ngir jàlla

​

Yaa tax banuy sikar di kañ Boroombi
Yaa tax banuy suuxloo baken beek Noon bi

​

Yaa tax banuy jappanté ak soppanté
Ken manatul tax ñuy xulook xeebanté

​

Na Yalla sëlmël saa su jot muy julli
Ci yaw Yonnen "waarisu kulli fadli"

​

Ku am keneen jappal banook sun Njoolmi
Nu àndak ak moom ba kerook xiyaami

​

Gungeenu Maam Limaamu bulnu bayyi
Ling nu digël ñaanal ba bunci tayyi

​

Sun xolyi yaako moom jëlël laabalko
Sun Ruuyi yaay boroom jëlël sellalko

​

Sun xelyi yaako feesé yaak sa waa kër
Jot sa ngëmëm Maam rekka tax ñuy kërkër

​

Na Abdulaahi saxfi doon sun mbegté
Sakkuk mbegëm fim tollu mooy li konté

​

Na yalla taawu sak njaboot te fegleen
Fun mana nekk nuy saxoo xidmaal leen

​

Yalla gërëmnu maynu koom nandalnu
Ca geeji leer ya lunfi def nga baalnu

​

"Wa Laailaaha illa laah Mahmuudu
Rasuulu-laah aamanatu yaa ma'buudu"

​

"Summa salaatul-laahi zil ikraami
'alan-nabiy wa aalihil-kiraami".

Brazzaville, le 12 Avril 2017